رعشہ جہانِ کفر میں، کانپی فضائے خیبری
اے کہ تیرے وجود سے لات و ہبل میں تھرتھری
ثور و حرا ترا مقام، جن و بشر ترے غلام
کاسہ بکف ترے حضور، سارا جہانِ قیصری
تونے عجب عطا کیا فقر و غنا کا فلسفہ
دل کا فقیر تو فقیر، دل کی غنا تونگری
تیرے قدم سے زلزلے قصرِ توہمات میں
ضربِ احد سے چور چور سارے بتانِ آزری
پل میں حرم سےقدس تک پل میں زمیں سےتا فلک
تیرے براق پر کہاں برقِ تپاں کو برتری
رونقِ بزم کن فکاں، نازشِ حسن عرشیاں
تیرے غلام کے غلام، سارے جنید و سنجری
طائرِ دل اسیرِ شب، سازِ حیات جاں بلب
سدرہ نشین تا کجا؟ دربدری گداگری
داروئے درد دل شہا! نغمۂ جاں فزا ترا
تیرا جمال دلربا کون و مکاں کی دلبری
شاہ بھی شہسوار بھی ، زاہد و شب گزار بھی
مظہر شرح ‘الکتاب’، تیری تمام زندگی
اے کہ دیار نور تو اور میں تیرگی تمام
تیرے طفیل مرتعش قلب و نظر میں روشنی
بزمئ کوچہ گرد پر ہو نہ حضور اگر نظر
کیسا غزل کا قافیہ، کیسی سخن شناوری
